ترا مسند ناز ہے عرش بریں ترا محرم راز ہے روح امیں

(شعر نمبر 04)
ترا مسند ناز ہے عرش بریں ترا محرم راز ہے روح امیں
تو ہی سرور ہر دو جہاں ہے شہا ترا مثل نہیں ہے خدا کی قسم                  مشکل الفاظ کے معنی:
*عرش بر یں-- عرش معلی ، خدا کاتخت* محرم راز-- جگری یار ،ہمراز * روح امیں --جبریل علیہ السلام 
* سرور-- سردار* مثل ۔۔ آپ جیسا،ثانی
مفہوم اشعار وخلاصہ تشریح
اے میرے عظمت و شان والے نبی! آپ ﷺ کی عظمتوں کا کون اندازہ لگا سکتا ہے کہ خدا کا تخت عرش معلی تو آپ ﷺ کے ناز و ادا سے بیٹھنے کی جگہ ہے اور سید الملائکہ جبریل امین علیہ السلام آپ ﷺ کا ہمراز وزیر ہے اور آپ ﷺ دونوں جہانوں کے بادشاہ ہوئے ( کیونکہ وزیر بادشاہوں کے ہی ہوتے ہیں) کیا کیا عرض کروں میرے آقا! ﷺ خدا کی قسم آپ ﷺ جیسا کوئی نہیں۔
سیدنا غوث اعظم رضی اللہ عنہ فرماتے ہیں۔
واھل السنۃ یعتقدون ان اللّٰہ یجلس رسولہ ونبیہ المختار علی سائر رسلہ و انبیاۂ معہ علی العرش یوم القیمۃ۔
اہل سنت کا عقیدہ ہے کہ اللہ تعالیٰ بروز قیامت تمام نبیوں اور رسولوں میں سے صرف امام الانبیاء علیہ السلام کو ہی اپنے ساتھ عرش معلی پر بٹھائے گا۔
؂ زہے عزت و اعتلائے محمد کہ ہے عرش حق زیر پائے محمد
مکاں عرش ان کا فلک فرش ان کا ملک خادماں سرائے محمد